Toen wie vrogger de wichter noar een openbare schoele deden, sprak de buurvrouw doar in verhulde taal schande van. Det het in haar ogen altied een rommetltie was bie die openbaren en zie as oma was blie met de protestantse keuze vöar haar kleinkinderen.
Door Denne van Knöldert
Ik probearen haar nog in het gareel te krieng met det ik toch echt dache det de wereld niet döar God eschapen is en heb wijselijk achterwege eloaten det ik juust wel van wat rommel hoale. Want wie waren op een buurtfeest, d’r zat al wat wijn in en de oamd was nog lang.
Wie bent noe twintig joar verder en mien wichter bent al een tiedie an het werk, beiden leavert ze noar mien mening een zinnige biedrage an de samenleving. Ie hoeft niet in een hemel te geleu’m öm d’r toch terechte te komm as Petrus noa oe dood toch onverhoopt de poart stiet te bewaken, denk ik altied mar.
Maar ik dwaal of. Een openbare schoele rommelig? Een protestantse schoele better? Vöarige wekke höaren ik det islamtische schoelen al vief joar lang as besten uut de CITO-toets komt. Det is nog ‘ns wat anders dan al det gedoe over het Haga-college. Íen islamitische schoele in de spotlights dut ons denken det zulk onderwies mar niks is. En toen bleek ok nog det het de inspectie was die de Haga-zaak had op’eklopt.
Inspecteurs… wie controleart hun werk eigenlijk?
Jammer det ze op de openbare schoele van mien wichter wél an kerst deden. Earst waart vanof half november die andere goedheiligman discriminearend döar de schoele. En in de nacht van 5 op 6 december dreijt het personel oaveruren öm de schoele te restylen vöar kerst. Personeel oaver de toeren, vriewilliger olders an hun taks, wichter oaver de grens van hun zenuwen. Dus is iederiene vandage an vakantie toe.
Pas op 6 januari hebt de onderwiezers de wichter wear in de klasse. Op de zundag doarvöar treft ze mekare al, want de kerstsfeer mut wel earst uut het gebow.
Det hebt islamitische schoelen ollemoal niet. Die hebt een moand extra öm te doene woar een schoele vöar bedoeld is.
Het bericht Denne zut det Islamitische schoelen mear onderwiestied hebt verscheen eerst op Opinie in Salland.
…
Het hele artikel is te lezen op www.Salland1.nl
Het bericht Denne zut det Islamitische schoelen mear onderwiestied hebt verscheen eerst op Salland TV.