Ik probear op het fietspad langs het station in Roalte altied oaver het wegvlak te fietsen zonder letters. Een kunstenaar had de vöarnamen van brugklassers van het Carmel College op det fietspad bedacht, mar gebruken zulke dikke markeringsverf det ’t niet prettig fietst.
Asof ie een bobbel op de baand hebt noa het oppompen.
Noar de kunstenmakergedachte mag ie niet vroa’ng, det is kunst. ‘Het is wat ie d’r in ziet’, geeft een kunstenaar altied as antwoard. Dus wat ik d’r in zie, det is het: hef gif brugklassers een extra steuntie in de rugge, iedere dag opnieuw in det earste mulijke joar op weg noar schoele. Althans, det bedoelt de kunstenaar. Mar ik geleuf det niet. Want noa dree kear is de lol d’r wel of. Dan begint det bobbelen mear op te vallen dan de namen
En ik denk overigens ok det ie een probleem bie de wortels an mut pakken en niet as zachte heelmeester. As ie een kind zeg det de brugklasse een rotjoar is, dan is het det ok. As ie kunst bedenkt öm het leed te verzachten, wakker ie het leed juust an.
Det zie in d’r ollemoal in.
De namen stoat an ien kaante, det ie d’r oaverhen mut as ie noar schoele fietst. Behalve die van Annabelle en Mohammed. Hun namen past niet op ien helfte, dus hobbel ie d’r ok oaverhen as ie an de andere kante fietst, noar huus op an. Zollen Annabelle en Mohammed doar al met lastig ‘evallen weane? Mohammed vaste mear dan Annebelle.
De brugklas-vöarnamen op de fietspaden kom ie op invalsweang van Roalte en uutvaslsweang van buurtdorpen tee’ng. Lest fietsen ik van Laag Zuthem noar huus. De wichter doar goat – denk ik – meestentieds noar een streng christelijke schoele in Zwolle. Mar Merle niet. Merle giet noar het Carmel. In haar ientie.
Ik zol denken det de kunst zich döarumme teeng Merle keart. ’t Is al niet makkelijk in zo’n geleuvig bolwerk d’r tussen te komm as ie wat anders teeng de kerke an kiekt, schildert ze oe name ok nog groot op het fietspad.
D’r bet disse zommer wat namen boa’m en onder ‘eschilderd. Ik denk döar de bond tee’ng pesten. En ik stel vöar det disse weg per ongeluk ok wat noar boa’m eschöam wördt in de onderholdslieste. Det d’r neej asfalt op mut.
Denne
Het bericht Denne: Merle verscheen eerst op Opinie in Salland.
…
Het hele artikel is te lezen op www.Salland1.nl
Het bericht Denne: Merle verscheen eerst op Salland TV.